我有我節奏 - Kyle Anderson
當時不與我嗰陣，你會點做？
你會選擇改變自己，去配合大勢。定係堅持自己，硬闖一條血路？
Kyle Anderson，UCLA2年級畢業生。對我嚟講，佢係一個異數嘅存在：6'9"身高，佢喺大學掛名SF，其實係一個PG。帶波上前，策動攻勢，幾乎都係由佢一手包辦。當時睇到佢，我係眼前一亮。首先，高佬打PG，令我諗起Magic Johnson。但更重要係，佢作為一個PG，佢嘅傳球視野同指揮能力，我係非常欣賞。而且佢基本動作同球場智慧，亦比一般人成熟。令我開始留意呢個球員。
但欣賞過後，我對佢嘅擔心亦隨之而來。欠缺個人得分板斧，內線單打把握力一般，甚至不一、不二、不三、不四嘅風格，都已經唔係最大問題。最大問題，可以由佢嘅花名得知‧‧‧‧‧‧
Slow-Mo
對於現今NBA講求速度，爭取快攻嘅年代，佢嘅打波節奏，完全係同NBA格格不入：無論射波、剷籃，總之佢做乜嘢，都係慢條斯理。所以，雖然佢有唔錯嘅技術同腦筋，但我都唔太睇好佢當時Draft Pick嘅行情。最後，佢亦如我所料，以31st Pick加入馬刺。
加入馬刺時，有唔少人都覺得佢好有運。因為馬刺陣中，有一位同樣以慢見稱嘅Boris Diaw，大家都相信Anderson可以從中學到唔少，甚至幻想緊佢會係Diaw嘅接班人。
但Anderson同Diaw唔同，Diaw佢係一個可以1~5號位都打到嘅全能球員。Diaw有熟練嘅籃底步法，同埋唔錯嘅3分能力。但Anderson就更似係一個偏向後衛打法嘅球員，而且外投能力只係一般。加上Anderson以往有球權在手，去到馬刺時，一缺乏持球時間下，佢NCAA時嘅表現完全唔可以反映返喺馬刺隊度。即使上季季初，隊中主力SF Kawhi Leonard因傷缺陣，Anderson亦未能以表現令球隊為佢留有一席位。最後，Anderson嘅新人球季，就喺D-League度結束。
經過一季後，Summer League度再次見到Anderson。經過一季後，佢好似繼續Slow-Mo，但同時，佢亦有所改變。
佢打波，依然冇一點爆發力。佢落場時，佢依然冇太多機會持球策應。但佢精進咗嘅中距離pull up，剷籃後嘅running shot，仲有加強咗嘅背籃轉身動作，令佢得分上俾到威脅對手。同時間，佢嘅Slow-Mo打法更係博犯規嘅怪招。好興喺2步上籃時突然放慢速度，加上佢用身型去保謢上籃，好多時，後追嘅對手都會俾佢陰到撞咗埋去，無啦啦就送多球罰球俾佢。雖然射波起手唔快，但佢反而加以利用，誘使對手上前block shot，然後立即改為pump fake後再帶到更open嘅地方起手。另外，當攻勢行得唔順時，佢永遠係身一個走到適當位置去救play嘅人，佢以佢嘅球場閱讀能力，即使唔再係球隊嘅主控人物，佢依然可以令球隊進攻保持流暢。最後，佢總算拎到職業身捱第一個個人獎項Summer League MVP，球隊亦成為Summer League冠軍。雖然唔係乜嘢大成就，但總算係個好開始。
雖然馬刺嘅正選SF位，如無意外都會係Kawhi Leonard嘅囊中物，但主力替補上，其實同位置球員並唔係咁多。Anderson要爭取一席位，始乎並唔係冇可能。
當時不與我，有人會改變自己，有人會堅持自己。但其實係有第三個選擇：忠於自己風格去精進自己，做到既不隨波逐流之餘，亦可以融入世界之中。
