喜出望外的Porzingis
大家仲記唔記得呢一幕？
當日，紐約人跳開Mudiay、Winslow，選咗7'1"新人Porzingis嗰陣，大家都對佢投下不信任一票。雖然佢身高手長，有活動能力，仲有全面嘅進攻技巧。但220磅嘅紙板身型，對抗性極度不足下，令Porzingis唔可以給予球迷足夠信心。我亦俾咗一個大不敬嘅花名：
紙紥公仔
好喇！新人第一個試驗場：Summer League開打喇！究竟呢隻紙紥公仔會唔會俾人吹飛又吹飛呢？
一場對76人嘅比賽，基本上可以睇到一d蛛絲馬跡‧‧‧‧‧‧
呢段片入面，佢對住被稱為今年新人入面最即食嘅Okafor。Porzingis所有嘅特點都可以睇得一清二楚。
首先，大家嘅擔心係冇錯嘅，Porzingis嘅對抗性真係差到不得了。不論post up搶位，籃板boxout，內線單防，佢都係處於下風；尤其佢幾次想打post play時，都俾Okafor頂到出3分線。呢樣嘢亦令佢得分同籃板數據上唔太亮眼。
但總體上呢？原來又唔係想像中咁大鑊喎！
雖然身型輸蝕，但Porzingis就以身高同技術，盡量彌補對抗性上嘅差距：
防守上多用繞前防守，以佢7'4"臂展，干擾對手傳球路線。雖然唔夠人好力，但佢防守時熟悉企位上嘅優勢，令matchup嘅Okafor就算轉到身，都轉咗去一個不利嘅位置。加上協防時機夠準，起跳block shot時機亦有一定把握，令到呢場波入面，Okafor對住佢反而冇乜明顯優勢。
進攻上，雖然因為對抗性問題，令人幾乎冇晒自主進攻能力，但佢就以走位意識，同埋處理球嘅成熟去補救。佢set pick比想像中穩陣而有效果，roll out時機及企位亦正確。接到波後對spacing概念唔差，一d SG式嘅冇波走位亦好有水準。即使冇咗單打能力，但以佢冇波走動同機會把握能力，一d catch and shoot同籃底執雞位，佢都經常捕捉得到。
總括而言，Porzingis雖然對抗性問題確實非常嚴重，但暫時嚟講，佢以身高、技術同籃球智慧，勉強仲可以作一定程度嘅彌補；足以作為一個輔助型的球員。不過，紐約人需要嘅，唔止係一個輔助球員，以係一個足以分擔Camelo Anthony嘅2號人物。
Porzingis將來會係第2個Nowitzki，定係第2個Barginani，就要睇球隊可唔可以有效咁裁培喇！
