由大飛敦到小牛敦，再由小牛敦到大飛敦
近日NBA最引起人討論嘅話題，莫過於小牛即將簽下DeAndre Jordan嗰陣，上演咗一幕王老虎搶親。最後大飛敦俾Doc Rivers + Chris Paul + Blake Griffin + Paul Pierce嘅誠意感動。決定原機飛返LA，同大飛再續前緣。
就呢件事，網絡上主要分為2個論點：
1) 大飛敦出爾反爾，冇品！
2) 大飛敦一日未簽約，一日都有權選擇(下刪10,000字與籃球無關嘅論述) 如果俾著我，我會點睇呢？
以我讀書學返嚟嘅合約法所講，不論書面定係口頭，只要雙方都表示接受合約條件的話，就係一個有效嘅合約。
咁聽，係咪覺得大飛敦唔啱呢？
咪住！等我地諗一諗，我地係由邊度聽到呢d消息？
係ESPN？係TNT？係Bleacher Report？係Yahoo Sports？
冇錯，係傳媒！
當然，我唔會懷疑呢班傳媒會講大話，放流料。但係去到呢一度，我地又諗返合約成立定義？
係「雙方表示接受合約條件」
但我地有冇經由DeAndre Jordan親自喺任何地方(包括任何報紙雜誌，甚至社交網絡媒體)講過類似「我會去小牛」、「我接受小牛報價」呢d說話呢？最少我做完research就冇啦！咁其實呢個就唔合乎合約成立嘅定義喇！所以NBA係有明文規定，球隊內部人士，喺未正式簽約前，係絕對唔可以公開討論或公佈任何球員簽約或交易事件。而Mark Cuban俾人罰2皮半，係合情合理。
咁傳媒又點知？嗱！正所謂傳媒神通廣大，人脈又闊，佢挽下手可以喺人屋企裝晒偷聽器呢！不過認真係，就算傳媒爆出嚟，佢都只算係「出自第3者口中發放」，並唔係當事人，所以口頭承諾，喺呢個事件上就唔成立。
Anyway，究竟大飛敦做返大飛敦係咪反骨？Mark Cuban係咪柒咗？呢樣嘢，最後只有當事人先知。但就呢件事可以反映到，當資訊進入網絡上神速傳播嘅年代，好多呢d商業行為，真係小心d好。
